Ginkumpirma sang Poland nga may mga ebidensya na ini nga gina-uyatan nga ang Russia amo gid ang yara sa likod sang hungod nga pagsunog sa pinakadaku nga shopping center sa capital sang pungsod.
Mayo 2024 sang natabo ang sunog sa Marywilska sa Warsaw kun sa diin 90% gid sang premises sang nahalitan. Maswerte nga wala sang mga tawo nga napatay bangud gab-i natabo ang insidente.
Suno kay Bombo Neva Intrepido Kessler, international correspondent sa Warsaw, nagaguwa nga ang ginsugo sang Russian federation agud nga magkomiter sang arson attack amo mismo ang tatlo ka Ukrainian nationals.
Isa ang naka-detain subong sa Poland, isa ang sa Lithuania, kag isa ang nakapalagyo nga gina-alegar nga yara subong sa Russia.
Suno kay Kessler, ini nga grupo sang mga suspek amo man ang sa likod sang arson attack sa isa ka furniture store sa Vilnius sa Lithuania sang nagligad nga tuig nga ginatudlo nga naangot man sa sugo sang Russia.
Ini nga mga development ang kabahin sang serye sang mga akto sang pagpangsabotahe sa Poland kag sa iban pa nga pungsod sa rehiyon nga ginabasol sa Moscow.
Sang nagligad nga tuig, madumduman nga nagmandu ang Polish government nga ipasirado ang isa ka consulate sang Russia kag gintabog man sa pungsod ang ila nga staff bangud sang sini nga ginaalegar mga akto sang sabotage and cyberwarfare.
