Nagpahanumdom ang Department of Energy (DOE) sa mga myembro sang Pantawid Pamilyang Pilipino Program ukon 4Ps nga indi man mag-abuso sa paggamit sang kuryente apisar nga sulod na sila sa expanded Lifeline Rate Subsidy Program sang gobyerno.
Santo sa Republic Act 11552 ukon ang Lifeline Rate Law, ang lifeline rate amo ang subsidized rate nga ginahatag sa kuwalipikado nga low-income consumers nga wala sang ikasarang sa pinansyal nga magbayad sang ila nga electricity bills.
Sa idalum sang programa, kun ang konsumo sang kuryente sang benepisyaryo yara lamang sa 50 kilowatt-hours (kWh) kada bulan, mahimo ini nga maka-avail sang 100% nga diskwento.
Sa interview sang Bombo Radyo kay Energy Secretary Sharon Garin, iya ginpahayag nga ang katungdanan sang benepisyaryo amo nga siguruhon nga manubo ang consumption sang elektrisidad kag indi maglapaw sa 50 kWh kada bulan.
Kun maglapaw naman sa nasambit nga konsumo, wala na sang discount suno kay Garin.
Pahayag sini, nagalaum ang ahensya nga maka-qualify para sa programa ang tanan nga myembro sang 4Ps, apang may iban nga wala sang balay, wala sang ginabayaran nga bills, ukon indi sa ila nakapangalan ang ila electric bills.
Nahibaluan nga diri sa Western Visayas, malapit 150,000 ang benepisyaryo sang amo nga programa. Ginlunsar ini kahapon sa Guimbal, Iloilo kun sa diin yara ang Energy Regulatory Commission (ERC), Department of Social Welfare and Development (DSWD), kag DOE.
Sa sini nga programa, wala na sang kinahanglan nga ipasa nga requirements ang mga benepisyaryo bangod automatic na ini nga partnership sang DSWD kag DOE. Ang DSWD amo na mismo ang nagahatag sang listahan sang mga kwalipikado nga benepisyaryo sa mga electric cooperatives.
Magluwas sa mga myembro sang 4Ps, ginalantaw man nga pasudlon sa Lifeline Rate Subsidy Program sang gobyerno ang iban nga mga pumuluyo nga halin sa low-income households. Kinahanglan lang ugaling suno sa tiglikom ang mga dokumento kaangay sang certificate of indigency kag mas mauti ang proseso.#
