Magasapol liwat ang mga opisyal sang Department of Energy (DOE) sa oil companies subong nga adlaw, Marso 3, bangud sa ginalantaw nga pagtimbuok sa presyo sang produktong-petrolyo bangud sa krisis sa Middle East.
Suno kay DOE-Oil Industry Management Bureau Director Rino Abad, sa meeting subong nga adlaw, istoryahan ang oil price trend kag kun paano sini maapektuhan ang kada semana nga price adjustment.
Posible suno kay Abad nga maistoryahan man nga indi man pagtingubon sa kada Martes ang tuman ka dako nga price hike.
Nagpanugyan man ang ahensya sa mga tag-iya sang salakyan nga magpangita sang pumping stations nga may pinakamanubo nga presyo sang langis, bangud may mga station man suno sa ila nga nagatanyag sang piso tubtub uno-singkwenta nga discount.
Nagapakig-angot naman subong ang DOE sa Department of Transportation (DOTr) kag sa Department of Agriculture (DA) kaangot sa possible nga pag-release sang fuel subsidies.
Una na nga nagpaandam ang ahensya nga possible lab-ot sa P7 tubtub P10 kada litro ang isaka sang presyo sang produktong petrolyo sa masunod nga semana bangud sang epekto sang gyera sang Israel kag US batok sa Iran.
Bangud sa amo nga gyera, gin-shutdown ang oil and gas facilities sa Middle East kag naapektuhan man ang paglabay sang mga barko sa Strait of Hormuz.
Sa bahin naman ni President Ferdinand “Bongbong” Marcos Jr., ginpahayag sini nga maga-istorya siya sa congressional leaders agud nga mahatagan siya sang otoridad nga buhinan ang excise taxes sa petroleum products.
Ginpasalig man sini nga may bastante nga suplay sang langis ang Pilipinas nga makasarang maglawig sang 50 tubtob 60 ka adlaw, bisan pa sa nagalala nga tensyon sa Middle East.
Suno sa presidente, bisan posible nga magsaka ang presyo sang langis bangod sang mga geopolitical tensions, indi dayon maapektuhan sang kakulangan sa suplay ang pungsod bangod may yara sang stockpile sang gasolina, fuel oil, kag kerosene.
Gindugang pa niya nga ang mga supplier sang petroleum products may yara man sang ila kaugalingon nga imbentaryo nga mahimo pa nila ma-release, nga magahatag sang dugang nga suplay para sa pungsod.
