Anom ka mga drivers sa Western Visayas ang nagpositibo sa drug test matapos ang ginpatigayon nga Oplan Harabas sang Philippine Drug Enforcement Agency (PDEA) 6 sa nanuhay-tuhay nga terminals sa Western Visayas, kahapon, Marso 30.
Base sa record sang ahensya, duha ang nagpositibo sa Pueblo de Panay Integrated Transport Terminal, Capiz; duha ang nagpositibo sa Culasi Ceres Terminal sa Antique; isa man sa San Jose de Buenavista Terminal, Antique; kag isa sa City Mall Terminal, Kalibo, Aklan.
Sa interview sang Bombo Radyo kay Ma. Graziella Tanaleon, spokesperson sang PDEA 6, iya ginpahayag nga kabahin ang surprise drug test sang Oplan Harabas nga programa sang ahensya kun sa diin ila ginapasiguro nga wala nagagamit sang iligal nga droga ang mga nagatarabho sa transport sector.
Suno kay Tanaleon, 822 tanan ang ginpaidalom sa nasambit nga drug test kun sa diin 761 diri amo ang drivers kag 61 naman ang kundoktor.
Pahayag pa ni Tanaleon, magapaidalom pa ang anom sa confirmatory test, apang nahibaluan nga ginkumpiskar na sang Land Transportation Office ang ila nga mga lisensya matapos nga nagpositibo kag temporaryo man nga ginpauntat ang ila nga byahe samtang wala pa ang mga ini nagnegatibo sa confirmatory test.
