ILOILO CITY- Gin-ako sang alkalde sang Syudad sang Iloilo nga mahimo nga kulang pa ang 60 ka adlaw para nga hawanan ang mga obstruction sa mga dalanon diri sa syudad sang Iloilo bilang pagtuman sa nangin mando ni Presidente Rodrigo Duterte tuhoy sa paghawan sa mga dalanon sa bilog nga pungsod.
Sa interview sang Bombo Radyo kay Mayor Jerry Treñas, iya ginpahayag nga ini ang rason kun ngaa nagapangayo gid ini sang bulig sa tanan nga pumuluyo sang syudad sa ginapatigayon subong nga Oplan Hawan Karsada sang Iloilo City Government.
Suno sa alkalde, pagasapulon niya ang Public Safety and Transportation Management Office (PSTMO), Task Force on Anti-Squatting and Illegal Structure Unit (ASIS-U), kag Barangay Affairs agud nga istoryahan ang ila nga assessment sa Oplan Hawan.
Ginpahayag ni Treñas nga isa sa mga problema kag pagpanghangkat sang Oplan Hawan team amo ang mga obstructions nga nagagabalik-balik kag mga pumuluyo nga nagapasaway sa gihapon.
Apang, suno sa alkalde, itugyan niya ini sa mga punong barangay kag kun indi nila ini matungdan, pat-ud nga magapangatubang sila sang konsekwensiya.
