ILOILO CITY – Nagakadunot na ang bangkay sang isa ka 62-anyos nga lalaki sang nasapwan sa sulod sang ginatiniran nga balay sa Q. Abeto St., Mandurriao, Iloilo City.
Ang biktima amo si Freddie Magallanes, residente sang Mambusao, Capiz, apang temporayo nga nagatinir sa distrito sang Mandurriao bangud caretaker ini sang isa ka propiedad.
Sa interview sang Bombo Radyo kay Police Senior Master Sergeant Mark Olano, imbestigador sang Mandurriao Police Station, iya ginpahayag nga ginabanta apat tubtob lima ka adlaw na nga napatay ang biktima.
Wala gilayon nakit-an ang tigulang bangud nagaisahanon lamang ini sa lugar kag wala sang kaupod nga pamilya.
Indi pa matumod sang kapulisan kun may yara sang foul play sa kamatayon sang 62 anyos nga tigulang apang santo sa ila pagpangusisa, may yara ini sang ginasuprer nga diabetes kag hypertension.
Ginapakig-angutan naman ang pamilya may kaangtanan sa ila desisyon kun ipaidalom pa ang biktima sa autopsy examination.
#
