ILOILO CITY – Nakatambong pa sa isa ka pagtilipon ang isa ka 80 anyos nga lalaki nga taga-Bo.Obrero, Lapuz, Iloilo City antes ini nakitaan sang sintomas sang coronavirus disease 2019 (COVID-19) kag napatay.
Sa interview sang Bombo Radyo kay Dr. Ma. Jocelyn Te, COVID-19 spokesperson sang Department of Health Region VI, iya ginpahayag nga wala lang partikular nga natumod sang pamilya kun ano nga okasyon ang ginkadtuan ni WV 679 apang posible nga didto nakuha ang virus.
Hulyo 3 sang nakitaan sang sintomas sang COVID-19 ang tigulang kaangay sang hilanat, LBM ukon loose bowel movement, kag kabudlay sa pagginhawa, rason nga gindala ini sa ospital.
Hulyo 6 sang ginkuhaan ini sang swab sample apang pagkasunod nga adlaw, Hulyo 7, napatay na ang pasyente.
Ginpahayag ni Dr. Te nga apisar subong lang, Hulyo 15, nakumpirma nga positibo ang pasyente sa COVID-19, una na nga naabisuhan sang ospital ang pamilya nga magpaidalom sa home quarantine kag likawan ang contact sa iban nga tawo.
Gin-cremate man ang bangkay sang amo pasyente.
Sa subong, nagapadayon pa ang contact tracing.
