Na-rescue sang Philippine Navy sa Western Mindanao ang 78 ka mga pasahero kag pito ka mga crew sang isa ka sakayan nga nagtakingking sa kadagatan sa Tawi-Tawi.
Suno sa Naval Forces Western Mindanao, nakabaton sila sang distress call kaangot sa natabo nga engine failure sa motor launch nga Dhiemal sa Sibutu Passage.
Gilayon nga ginpadala sang Naval Task Force 61 ang PC390 halin sa Lamion Wharf sa Bongao, Tawi-Tawi agud suguran ang maritime search kag rescue mission.
Pila ka oras ang nagligad, naestablisar na ang radar kag visual contact sa Dhiemal nga nahamtang siyam ka nautical miles southwest sang Bakalao Point, Sibutu, Tawi-Tawi.
Kasunod sini, ginbutong ang sakayan padulong sa Bongao.
Gin-amuma man kag ginpakaon ang mga pasahero kag gin-tugyan sa Ministry of Social Services and Development para sa counselling, stress debriefing kag ginpadala sa ila tagsa ka pamilya.
Nagsulit naman sa pagpahanumdom si Naval Forces Western Mindanao Commander Rear Admiral Donn Anthony Miraflor sa seafarers nga siguruhon gid ang seaworthiness sang mga sakayan antes ang paglayag agud nga malikawan nga mabutang sa risgo ang kabuhi sang mga pasahero. #
