Isa sa mga ido nga naga-atake sa mga kasapatan sa Guimaras, napatay na

ILOILO CITY – Napatay sang mga barangay tanod sa Tastasan, Buenavista, Guimaras ang isa sa apat ka mga ido nga nagapamatay sa mga kasapatan sa lugar.
Sa interview sang Bombo Radyo, ginpahayag ni Barangay Kagawad Rolando Garde nga ulihi nga natabo ang pag-atake sang dalagko nga mga ido kahapon sang hapon sa diin ila napatay ang isa sa mga ini.
Naglab-ot na sa 22 ka mga kanding ang napatay, masobra 20 ka mga pato, tatlo ka tinday sang baka, duha ka manok nga inugbulang kag isa ka pabo ang napatay sang nasambit nga mga ido.
Ginpadulungan na sang Department of Agriculture (DA) Region 6 ang Barangay Tastasan.
Suno kay Dr. Pacifico Lumauag sang DA Region 6, ila ipadalom sa pagtuon ang napatay nga ido
Ginpanugyan naman sang Department of Agriculture sa mga pumuluyo sang Tastasan nga indi pagkan-on ang mga sapat nga ginpamatay sang ido bangud posible nga kontaminado ini sang rabies.