Pormal na nga ginbuksan sang probinsya sang Guimaras ang 10 ka adlaw nga selebrasyon sang 34th Manggahan Festival.
Isa sa ginabantayan sa maduagon nga selebrasyon amo ang “Mango Eat-All-You-Can” nga available sa bilog nga duration sang kapistahan.
Suno sa Guimaras Provincial Government, 18 metric tons ang ginhanda subong nga tuig nga mas madamo sang lima ka metriko tonelada ipaanggid sang 2025.
Sa interview sang Bombo Radyo kay Jaypee Entredicho, ang tourism officer sang amo nga probinsya, ginpahayag sini nga maka-enjoy gid ang mga Guimarasnon kag ang mga bisita sang unlimited nga mga paho sa bayad lamang P100 sa sulod sang 30 minutos.
Ginpasalig man ni Guimaras Governor Ma. Lucille Nava nga mas madamo sang nagahulat para sa festival-goers subong nga tuig.
Balantayan sa gihapon ang cultural presentations, ang music festival, ang Miss Guimaras pageant, kag ang bag-o pa gid nga mga aktibidad para sa mas bag-o nga eksperyensya.
Lakip man sa major feature sang selebrasyon amo ang pagsapubliko sang ila bag-o nga festival logo nga may tema nga “Mangoes and More” bilang pagpakilala sa Manggahan bilang globally competitive agri-festival.
Nahibaluan nga P40-million ang ginpain sang probinsya para sa ila 2026 celebration.
Bangud sa ginalauman nga pagdugok sang mga pasahero, ginpalawig man ang byahe sang mga fiber boat tubtub alas 2 sa kaagahon.
Magalawig ang selebrasyon sang Manggahan tubtub sa Mayo 24.
Nahibaluan nga nag-deploy man sang masobra 500 ka security, public safety, kag emergency response personnel sa idalom sang Task Group Manggahan agud nga mapasiguro ang safety sang tanan kadungan sang kapistahan.#
