Police trainee nga nagpangilkil sa sibilyan, ginbiktima man ang kaangay nga police trainee; NAPOLCOM ginakahuya ang ginhimo sang police

ILOILO CITY – Ginakahuya sang National Police Commission (NAPOLCOM) Region 6 ang ginhimo nga pagpangilkil ni PO1 Glenn Garbosa.

Sa interview sang Bombo Radyo kay Allen Recabar Camiring, Pre-charge Investigator kag Spokesperson sang NAPOLCOM-6, daku nga kagub-anan sa hanay sang Philippine National Police (PNP) ang ginbuhat ni Garbosa.
Naghatag na si NAPOLCOM 6 Regional Director Atty. Marty palomar sang go signal gani umpisahan na sang NAPOLCOM suno kay Camering ang imbestigasyon.
Ginpasalig ni Camering nga mapahalin sa pwesto si Garbosa bangud sa iya nabuhat nga sala.
Samtang magluwas sa malapit 200 thousand pesos nga nakilkil ni Garbosa sa isa ka retired teacher sa Jaro Iloilo City, nangbaldog man ini sang kwarta sa kaangay niya nga police trainee nga nagalab-ot sa kapin 50 thousand pesos.
Suno kay Camering, ginbiktima man ni Garbosa ang duha niya ka classmates sa training.
Una nga ginbiktima ni Garbosa si PO1 Paolo Operio nga ginhulaman niya sang 1,500 pesos apang sang gin-awtorisa nga withdrawhon ang kwarta sini, gin-ubos niya kuha ang kapin 20 mil pesos nga unod sang ATM card.
Sunod naman niya nga ginbiktima si Po1 Evelio Aranza nga ginhulaman man ni Garbosa sang 1,500 tungod kinahanglan sini magpa ospital apang gin-ubos man withdraw ang kapin 30 mil pesos nga unod sang ATM card matapos ginpahulam ini sa iya.
Mas malala pa gid suno kay Camering tungod matapos niya mawithdraw ang kwarta, ginpalagyo pa niya ang ATM kag ginprenda sa isa ka lending firm sa Bacolod City matapos makakita sang ka-kuntsabo nga amo ang nagpakuno-kuno nga si PO1 Aranza.