ILOILO CITY – Nagnubo ang kaso sang teenage pregnancy sa Western Visayas.
Sa interview sang Bombo Radyo kay Roilo Laguna, tagpamaba sang Commission on Population and Development – 6, iya ginpahayag nga ang teenage pregnancy sa age bracket nga 15 tubtub 19 anyos ang nagnubo sa 5.3%.
Sa nasambit nga datus suno kay Laguna, wala pa diri nadala ang numero sang teenage pregnancy sa 10 tubtub 14 anyos.
Sa subong nga tuig, isa ang Western Visayas sa mga rehiyon sa pungsod nga may pinakamanubo nga kaso sang teenage pregnancy samtang ang Davao City naman ang may pinakamadamu nga kaso nga nagalab-ot sa 17%.
Paagi sa maid-id nga kampanya sang gobyerno, ginpahayag ni Laguna nga dapat nga madula na ang teenage pregnancy bangud nga ini ang makatuga sang maternal death, infant mortality, malnutrition kag iban pa nga balati-an sa lapsag kag iloy.
Ini bangud nga ang mga teenager ukon mga pamatan-on ang indi pa makasarang nga magdala kag magsagod sang lapsag.
Sa pihak sini, indi man malikawan suno kay Laguna nga may matabo nga teenage pregnancy bangud nga ang iban sa mga pamatan-on ang biktima
sang sirkumstansya kasubong sang pagpanghimulos kag sala nga pagpati.
Sa pagbuligay sang Department of Health (DOH) kag sang Department of Education (DepEd), ginadihon na ang guidelines tuhoy sa Comprehensive Sexual Education nga dapat ilakip sa curriculum agud nga mapahangop sa mga estudyante ang tuhoy sa teenage pregnancy kag kun ano ang mga malain nga epekto sini.
