ILOILO CITY – Magapatigayon sang labing una nga ‘Tunog-Tikang’, isa ka West Visayan Cultural Show ang University of the Philippines Visayas-High School.
Sa interview sang Bombo Radyo kay Hermie Cartagena, artistic director kag Music and P.E. Instructor sang UPV-High School, iya ginpahayag nga ang nasambit nga cultural show ang igadul-ong sang Harana and Dance Club sang UPV nga gin-unat humalin pa sang dekada 90.
Agud nga pukawon ang tagipusu-on sang mga taga-Western Visayas, liwat nga ginbuhi ang ‘Tunog-Tikang’ agud nga itib-ong ang mga folk song kag folk dance nga nagapakita sang kultura sang rehiyon.
Indi mahinago suno kay Cartagena nga ang mga ulihing tubo sa subong ang indi na pamilyar sa mga folk song kag folk dance sang Western Visayas bangud sa mabaskog nga impluwensya sang iban nga kultura.
Daku man nga pagpanghangkat para sa mga manunudlo suno sa natungdan ang pagtudlo kag ang pagpahangop sang kultura sa mga estudyante ilabi pa nga ginduso sang Department of Education (DepEd) nga dulaon na ang Filipino kag Panitikan sa college curriculum.
Samtang, para naman sa mga High School students nga katapo sang Harana and Dance Club sang University of the Philippines-Visayas, ang paghibalo sang kultura sang Western Visayas ang kasubong lamang sang paghibalo kag pagkilala sang aton ginhalinan.
Suno kay Luis Rabot IV, ang kultura sang Western Visayas ang makabig nga manggaranon bangud sa mga manami nga saot kag ambahanon.
Ang mga Western Visayan folk song kag folk dance ang nagapakita kun ano nga sahi sang tawo ang mga Ilonggo.
Para kay June Miles Trinidad, humalin sang siya ang elementarya pa lang, mahilig na siya sa folk songs.
Sa subong nga mabaskog ang impluwensya sang iban nga kultura, kinahanglan nga itib-ong kag ipabilin sang mga taga-Western Visayas ang kaugalingon nga kultura paagi sa pagpatigayon sanga mga cultural show.
Kasubong nga nangin adbokasiya naman sang estudyante nga si Mark Leo Layson ang pagtib-ong sang folk dance kag folk songs sang Western Visayas.
Suno kay Layson, ang iya ‘passion’ sa pagtuon kag ang iya huyog sa musika kag saot ang nagtulod sa iya agud maka-implwensya sa iban nga palanggaon ang kultura sang Western Visayas.
