ILOILO CITY – Indi sa gihapon makapati ang isa ka Bachelor of Music Graduate matapos nga nagpagkit sang kasaysayan sa University of San Agustin Conservatory of Music bilang labing una na Latin Honor awardee.
Si Joseph Romeo Alfaras sang Mina, Iloilo nga nagtapos bilang Cum Laude, ang labing una nga graduate nga nakakuha sang Latin Honor sa sulod sang 52 ka tuig humalin sang gintukod ang University of San Agustin Conservatory of Music.
Sa interview sang Bombo Radyo kay Alfaras, iya ginpahayag nga naga-edad pa lang siya sang apat ka tuig, nakitaan na siya sang abilidad sa pagkanta sa diin ang iya iloy ang anay katapo sang choir sa simbahan.
Nangin daku nga impluwensya sa iya suno kay Alfaras agud nga mag-eskwela sa Conservatory of Music amo ang iya pamilya kag abyan nga nagduso sa iya nga ipadayon ang huyog sa musika sa pihak sang ‘stigma’ sa iya kurso.
Sa iya ginpili nga kurso suno kay Alfaras, wala nangin mahapos ang iya inagyan tubtub nga matapos ang lima ka tuig nga pagtuon.
Madamu sang makabig ‘ups and downs’ sa iya kabuhi bilang isa ka estudyante apang ang iya pagpalangga sa musika ang nagtulod sa iya agud nga lab-uton ang iya handum nga makatapos sang pagtuon.
Ginpahayag sang natungdan nga tuman ang iya pagpasalamat bangud nga wala gid niya ginlauman nga makakuha sang Latin Honor kadungan sang iya pagtapos sa kolehiyo.
