Gin-athag sang Department of Interior and Local Government (DILG) nga indi pa mahimo ma disqualify sa iya kandidatura bilang alkalde sa banwa sang Janiuay Iloilo si anay Mayor Frankie Locsin.
Ini apisar nga ginpamatbatan sang Korte Suprema si Locsin sang perpetual disqualification kag pagkapreso sang anom tubtub pulo ka tuig.
Ang nasambit nga desisyon ang may kaangatanan sa pagbakal sang bulong nga nagabalor sang P15 million sang nagapungko pa ini bilang alkalde sang banwa sang Janiuay, Iloilo.
Sa exclusive interview sang Bombo Radyo Iloilo kay Atty Cedric Jaranilla, legal officer sang DILG Region 6, iya ginpahayag nga nagakadapat nga may mag file sang petition for disqualification sa Commission on Elections, agud mangin wala sang kabilinggan ang kandidatura ni Locsin.
Kuntani suno kay Jaranilla, ang Comelec na lang mismo ang maghimo sang tikang sa tion nga mahibaluan nila nga gindagdagan sang disqualificiation ang anay alkalde.
Matandaan nga una na nga nagpakatig-a si Locsin nga batunon ang pamatbat sang Korte Suprema.
Suno kay Locsin, santo sa iya pag-usisa sa abogado nga si Atty Rene Villa, ang pamatbat ang mangin epektibo lang sa tion nga mabaton na sang counsel kag akusado ang kopya sang desisyon ang Korte Suprema nga sa subong wala pa sa gihapon nabaton.
Magluwas sini, may yara pa sang unresolved nga motion for reconsideration.
Gin-athag man sang anay alkalde nga ang Comelec lang ang maka disqualify sa iya.
