Pagsagod sang karabaw sa pungsod, amat-amat na nga nagasanyog-PCC

CALINOG, ILOILO – Amat-amat nga nagasanyog ang industriya sang pagsagod sang karabaw sa Pilipinas.

Santo sa datus sang Philippine Carabao Center, naglab-ot sa 2.9 mullion ang populasyon sang carabao sa bug-os nga pungsod subong nga tuig ipanggid sang mga nakaligad nga tinuig nga yara lamang sa 2.5 tubtub 2.6 million.

Sa interview sang Bombo Radyo kay Arn Granada, Center Director sang Philippine Carabao Center sa Calinog, Iloilo, iya ginpahayag nga samtang naga-moderno anag pamaagi sa pagpanguma, kinahanglan man nga mangin moderno ang pamaagi sa pagsagod sang karabaw para sa meat kag milk production.

Ang kanding, baka kag karabaw suno kay Granada ang mayor nga ginakuhaan sang gatas nga ginabaligya sa pungsod.

Nagakinahanglan suno kay Granada nga balansehon sang gobyerno ang meat kag dairy production sa mga karabaw agud nga malikawan ang kakulang sang karne kag gatas gikan sa nasambit nga sapat.

Sa isa ka tuig, nagalab-ot sa 1.9 billion kilograms nga carabao milk ang gina-import sang Pilipinas rason nga kinahanglan nga pasangkaron ang pagsagod sang mga bakiya nga karabaw.