JORDAN, GUIMARAS – Napun-an sang pagpanghangkat ang nangin kabuhi sang isa ka anak nga napahilayo sa iya iloy.
Ginpakigbahin ni Nica Gayas Gabales, 17, sang Hoskyn, Jordan, Guimaras, ang iya nangin kabuhi nga wala sang iloy nga naga-atipan sa iya.
Ginpahayag ni Nica nga nagdaku siya sa Palawan sa lugar sang iya Lolo sa diin sila nag-istar nga mag-iloy sa diin liwat nga nakapamana ang iya iloy kag naka-angkon sang duha ka utod.
Bangud nga nangin pigado ang ila kita sa pagpananom sang balinghoy kag iban pa nga kararuton, nagdesisyon ang iya iloy suno kay Nica nga magtrabaho sa luwas sang pungsod.
Samtang nagadugay, ginpahayag ni Nica nga ginasakit siya sang iya manding rason nga iya ginsugid sa iloy ang tuhoy diri.
Sang una suno kay Nica, wala pa nagpati ang iya iloy sa iya nga ginapanghambal tubtub nga napamatud-an nga ginasakit siya sang iya manding.
Ini ang rason nga ginkustodiya siya sang iya tiya sa diin ginpahayag ni Nica nga la-in gid ang iya pagpangabuhi sa luyo sanga iya kaugalingon nga pamilya.
Mas nagdugang pa gid sa iya ginabatyag nga kasakit sang nahibalu-an nga nabunggu-an sang police car ang iya iloy sa luwas sang pungsod.
Halos indi naman niya makilala ang iloy sang liwat sila nga nagkitaay diri sa Iloilo sa diin para kay Nica, kasubong nga naka-agi sang pagmaltrato ang iya iloy.
Bisan nga mabudlay sa iya bahin suno kay Nica, gina-agwanta niya nga mapahilayo sa iloy agud nga maka-angkon man sila sang maayo nga buwas-damlag.
Samtang, para naman sa iloy ni Nica nga si Vergie Gabales, katungdanan niya bilang isa ka iloy nga buhaton ang tanan para sa kaayuhan sang iya mga anak.
Ginpahayag man ni Virgie nga nagalab-ot sang duha ka tuig bag-o siya makapauli diri sa Pilipinas rason nga amo na lang ang iya nga kahidlaw sa iya mga kabataan.
Bilang isa ka OFW, ginpahayag ni Gabales nga indi mahapos ang iya trabaho ilabi pa nga nagapangibabaw ang nabatyagan nga kamingaw sa iya nga pamilya apang wala siya sang may mahimo kundi agwantahon ang kabudlay para nga makatapos sa pagtuon ang iya kabataan.
