ILOILO CITY – Nagapabilin ang panindugan ni Iloilo City Councilor Love Love Baronda kag sang iya grupo sa indi pagpabor sa State of Calamity sa syudad sang Iloilo.
Ini ang may kaangtanan sa wala sa gihapon mapatuman nga water distribution sa syudad sang Iloilo bangud nga wala mahitso ang Memorandum of Agreement sa tunga sang Iloilo City Government kag Metro Iloilo Water District (MIWD).
Sa interview sang Bombo Radyo kay Baronda, iya ginpahayag nga wala sang pagbag-o sa iya panindugan nga ‘invalid’ ang pagdeklarar sang State of Calamity bangud nga wala sang quorum sang ini ang gin-aprobahan.
Magluwas diri, ginpahayag man ni Baronda nga wala sang water crisis sa syudad sang Iloilo tuga sang El Niño bangud nga ang kulang lang amo ang water distribution kag subong nga Mayo, nag-umpisa na ang tig-ululan.
Kasubong suno kay Baronda nga gindali-dali ang pagdeklarar sang State of Calamity agud nga magamit sa pamulitika ang pondo.
Kun ginpaboran sang konseho ang ginaduso nga Water Efficiency, Protection, and Conservation Council kag ginpahanugutan nga sa trust fund na lang kuhaon ang pondo nga gamiton sa water distribution, kun tani suno kay Baronda, wala sang kakulang sang tubig sa syudad.
Indi na suno sa iya maglab-ot sa P125 million ang kinahanglan nga pondo bangud nga ang ginpa-in nga P2.8 million gikan sa trust fund ang bastante na para sa water distribution.
Nauna na nga ginbasol ni Mayor Jose Espinosa III ang pila ka mga konsehal matapos nga naabtan lang sang tig-ululan apang wala man sa gihapon ma-release ang pondo para sa State of Calamity bangud sa pag-boycott sang pila ka mga konsehal.
Yari ang nauna nga pahayag ni Mayor Espinosa tuhoy sa pagbasol sa mga konsehal:
Yari naman ang reaksyon ni Baronda:
