ILOILO CITY – Wala sang may ginhinulsulan ang isa ka Ilongga Music Student sa iya ginpili nga kurso.
Ini ang kasunod sang iya pagdaug bilang national champion sa Vocal Solo sa bag-o lang nagtakop nga Private Schools Athletic Association Sports Foundation Incorporated (PRSAA) nga ginpatigayon sa Davao City.
Sa interview sang Bombo Radyo kay Ma. Janela Galorport sang Miag-ao, Iloilo kag incoming Second Year Student sa Conservatory of Music sang University of San Agustin, iya ginpahayag nga humalin sang una, Medical Course ang iya luyag nga kuhaon bangud man sa impluwensya sang iya pamilya apang ang huyog sa musika ang nagtulod sa iya agud nga magpa-enroll sa Music course.
Ginpahayag ni Galorport nga indi mahapos ang mangin isa ka Music Student bangud nga magluwas sa madamo nga school requirement, madamo man sang dapat nga tandaan agud nga maprotektahan ang tingog.
Bag-o pa man nangin national champion, ginpahayag ni Galorport nga una siya nga nag-audition sa ila eskwelahan, tubtub nga nahatagan sang kahigayunan nga magdaug sa Iloilo PRISAA, Regional PRISAA tubtub nga iya gintiglawas ang Western Visayas sa national PRISAA.
Pila ka semana bag-o ang kompetisyon, ginpahayag ni Galorport nga naka-angkon pa siya sang ubo apang nadula ang iya kakulba bangud nga todo ang suporta sang iya pamilya nga nagtan-aw gid sang iya performance.
Sa pihak sang mga pagpanghangkat, ginpahayag sang natungdan nga gin-ubayan man siya sang Ginuo bangud nga nangin maayo ang iya performance kag gindeklarar nga national champion sa Vocal solo.
Kadungan sini, ginakabig man ni Galorport nga mabudlay nga ambahanon ang ‘Don’t Rain on My Parade’ nga iya gin-perform bilang broadway.
Yari ang pagpahayag ni Galorport:
Samtang, yari naman ang sample ni Galorport sa iya gin-perform sa National PRISAA:
