ILOILO CITY – Indi sa gihapon makapati ang isa sa mga naka-sulod sa Top 10 sang Licensure Examination for Teachers (LET) 2019 matapos nga ginpaguwa ang resulta sang pasinawan.
Sa interview sang Bombo Radyo kay Dhaenalene May Quiñones Evangelista, Special Education Graduate sang West Visayas State University (WVSU) kag Top 6 sa LET 2019 -Elementary, iya ginpahayag nga tubtub subong, indi siya sa gihapon makapati nga isa siya sa nakasulod sa Top 10.
Ginpahayag ni Evangelista nga tumandok siya sang Pangasinan apang sa subong, sa Mandurriao, Iloilo City na siya naga-istar kaupod ang iya pamilya.
Ginpakigbahin ni Evangelista nga siya ang labing una nga manunudlo sa ila pamilya rason nga ang iya nga pagkasulod sa Top 10 ang isa ka daku nga kadalag-an.
Bilang isa ka college student suno kay Evangelista, normal lamang nga masako ang schedule ilabi na kun may yara sang test ukon mga deadline sa pagpasa sang school requirement.
Sa pihak sini, ginatunguhaan man niya nga mabalanse ang iya academic kag social life bilang isa ka pamatan-on.
Bilang pangayaw, isa man sa mga pagpanghangkat sa iya amo ang paghibalo sang Hiligaynon apang ang language barrier suno sa iya ang indi upang agud nga magpakigbagay sa mga Ilonggo kag magpangibabaw sa klase.
Sa pagkamatuod suno kay Evangelista, naatrasar ang iya nga pagkuha sang pasinawan bangud sa personal nga rason.
May panugyan man ang natungdan sa mga wala ginswerte sa subong nga pasinawan nga indi magdula sang paglaum bangud nga ang kabuhi ang indi kasubong sang karera nga nagapauna-una.
Pagkatapos nga napakasar sa pasinawan, luyag naman ni Evangelista nga magtuon sa Matser’s Degree kag magtudlo diri sa syudad sang Iloilo.
Nahibalu-an nga si Evangelista ang nagtapos nga Magna Cum Laude sa WVSU kag nakakuha sang rating nga 91.80% sa pasinawan.
