MIAG-AO, ILOILO – Nagalaum ang mga Onion Farmer sa Miag-ao, Iloilo nga makatibawas gikan sa pigado nga baligya-anay sang sibuyas.
Sa interview sang Bombo Radyo kay April Joy Depamaylo, Municipal Agriculturist sang Municipal Agriculture’s Office sang Miag-ao, Iloilo, iya ginpahayag nga may yara sang masobra sa 500 ka mga Bulb Onion Farmer kag nagalapad sang 200 ka ektarya ang talamnan nga duta.
Ang 200 ka ektarya nga talamnan ang tuman ka gamay ipaanggid sa 1,900 ektarya nga talamnan sang sibuyas sa MIMAROPA ukon Region IV-B.
Bangud sini suno kay Demapaylo, madamu ang supply sang sibuyas nga halin sa iban nga rehiyon ang nagasulod sa Iloilo rason nga apektado ang mga Ilonggo Bulb Onion Farmer.
Ini ang rason suno kay Demapaylo kun nga-a ginpauntat sang gobyerno ang pag-import sang sibuyas.
Kun sang mga nakaligad nga tuig suno sa natungdan, madahog ang baligaya-anay sang sibuyas apang sa subon naman, nabudlayan ang mga Bulb Onion Farmer nga magpangita sang buyer.
Sa pihak sini, ginpahayag ni Demapaylo nga normal lamang sa negosyo nga mapiyerde apang magapadayon ang Local Government Unit (LGU) sang Miag-ao sa pagtib-ong sa palangabuhi-an sang mga Onion Farmer.
