ILOILO CITY – Madamu sang reklamo nga nabaton ang Security and Exchange Commission (SEC) batok sa mga lending company sa Western Visayas.
Sa interview sang Bombo Radyo kay Susan Grecia sang SEC-6, iya ginpahayag nga kalabanan sa mga reklamo nga ila nabaton amo ang tuhoy sa mga bogus nga lending company, mataas nga interest rate kag ang pagpangharass sang lending company sa mga customer nga wala nakabayad.
Ginpahayag ni Grecia nga bag-o mag-utang, kinahanglan nga hibaluon anay kun bala rehistrado sa SEC ang isa ka lending company.
Ang mabudlay lang suno kay Grecia amo nga madamu subong ang mga nagapakilala nga lending company nga wala man sang kaugalingon nga opisina, opisyal nga contact number kag sa social media, text ukon tawag lamang ginapaagi ang transaksyon.
Ang mga kasubong sini nga modus suno kay Grecia ang wala sang nagakaigo nga documentation kag makabig nga illegal.
Ang nagakaigo nga proseso suno kay Grecia bag-o mahatagan sang permit ang isa ka lending company amo ang pag-apply sang application to operate, pagpasa sang mga dukomento na ginahingyo sang SEC, P1 million nga capitalization requirement kag dugang nga dukomento ilabi na kun may yara sang foreigner nga board of director ang isa ka lending company.
Ginapanugyan naman sang SEC suno kay Grecia amo nga indi dapat maglapaw sa 5% ang interest rate nga ginahatag sang tagsa ka lending company.
Agud nga malikawan ang huol, ginpahayag ni Grecia nga dapat sundon ang ‘responsible borrowing and loan interest’.
