ILOILO CITY – Magapatigayon sang duha ka adlaw nga investor’s forum ang Security and Exchange Commission (SEC) sa syudad sang Iloilo.
Sa interview sang Bombo Radyo kay Atty. Russel Ildesa, Officer-In-Charge sang SEC-6, iya ginpahayag nga ang nasambit nga investor’s forum ang patigayunon sa Hunyo 20 tubtub 21 sa Iloilo Convention Center (ICC).
Mismo ang mga tiglawas sang SEC-Manila ang magaserbe nga dinapit nga bisita agud nga magpaathag tuhoy sa pila ka mga topiko sa nasambit nga aktibidad.
Lakip sa paga-istoryahan amo ang tuhoy sa investment scams, Revised Corporation Code of the Philipines, monitoring sang SEC sa mga foundation, lending kag incorporation, micro-financing kag iban pa nga sahi sang negosyo sa pautang kag ang bag-o nga proseso sa pag-apply sang permit sa SEC.
Katuyu-an sang nasambit nga investment forum suno kay Atty. Ildesa amo nga mapaathagan ang tanan tuhoy sa husto nga proseso sang pag-utang kag pagpautang kag agud nga malikawan ang scam.
