ILOILO CITY – Bugal para sa isa ka anay manunudlo nga pasidunggan bilang champion alumni sa 1st Pinwheel Awards: Champions of Children sang CHILD Initiative.
Sa interview sang Bombo Radyo kay Maria Corazon Buala, anay manunudlo kag subong operations manager sang Ace2Ace Training and Education, iya ginpahayag nga ang nasambit nga pasidungog nga iya nabaton ang ginhatag sang CHILD Initiative, isa ka Non Government Organization (NGO), sa mga tawo nga nagatib-ong sang kaayuhan sang kabataan.
Ginpahayag ni Buala nga bag-o pa man siya nangin isa ka manunudlo, nagtrabaho siya sa isa ka NGO kag ini ang rason kun nga-a, iya nga ginbayaan ang teaching profession.
Ang pagbulig sa mga nagakinahanglan ilabi na sa kabataan ang malapit sa iya tagipusu-on bangud nga mismo siya ang sadto anay isa ka sponsored child sang nasambit nga NGO nga kilala sadto nga Christian Children’s Fund.
Mismo ang iya iloy suno kay Buala ang nangin inspirasyon niya sa pagpili sang career.
Ginpahayag man sang natungdan nga labaw sa pasidungog, bugal para sa iya nga mahatagan sang kahigayunan nga makapadulong sa luwas sang pungsod para sa pagtib-ong sang child protection kag itiglawas sang 12 million ka mga kabataan nga pinoy.
Importante suno sa iya ang paghatag sang proteksyon sa mga kabataan nga ginakabig nga paglaum sang sosyodad.
Nagalaum naman si Buala nga malab-ot man niya ang handum nga makapatindog sang kaugalingon nga NGO agud nga makahatag sang bulig sa mas madamu nga kabataan.
