ILOILO CITY – Nabudlayan ang isa ka pageant blogger sa pagpili sa kun sin-o sa 40 ka mga kandidata ang magadaug sa coronation night sang Binibining Pilipinas 2019 karon sa gab-i sa Smart Araneta Coliseum.
Sa interview sang Bombo Radyo kay Norman Tinio, iya ginpahayag nga nabudlayan siya sa pagpili sa kun sanday sin-o ang magadaug sa anum ka mga beauty titles nga ginalakipan sang Binibining Pilipinas Universe, International, Intercontinental, Supranational, Globe kag Grand International.
Ginpahayag ni Tinio nga ang subong nga batch sang Binibining Pilipinas ang tuman ka lain ipanggid sa nakaligad nga tuig.
Ini bangud nga sang 2018 suno kay Tinio, makita na sa pre-pageant activities kun sanday sin-o nga mga kandidata ang nagapangibabaw.
Sa subong nga tuig suno sa pageant blogger, kadam-an sa mga kandidata ang maalam, maanyag, talentado kag nagapakita kun ano ang isa ka Filipina.
Bisan siya suno sa natungdan ang nabudlayan sa pagpili sa kun sin-o ang iya ‘hot picks’ bangud man sa impluwensya ni Miss Universe 2018 Catriona Gray nga nagpakita sang mataas nga standards sa Miss Universe.
Sa pihak sini, ginpahayag ni Tinio nga ang tagsa ka kandidata ang may yara sang pinasahi nga abilidad kag amo man si Catriona.
Kun sin-o man ang magadaug sa Binibining Pilipinas 2019 suno kay Tinio, nagakadapat nga magpakita sang maayo nga performance agud nga makabig nga ‘deserving’ sa korona.
