GUIMARAS -Ginakabig sang isa ka amay nga ‘blessing in disguise’ ang iya pagkapreso agud nga mahatagan sang maayo nga pangabuhi ang iya pamilya.
Nangin emosyonal si Giovanie Geromiano, tumandok sang Tapaz, Capiz kag inmate sa Bureau of Jail Mananagement and Penology (BJMP) facility sa Guimaras, samtang ginsaysay ang iya kabuhi bilang preso kag bilang amay sa iya lima ka kabataan.
Bag-o pa man napreso, ginpahayag ni Geromiano nga nagatrabaho siya sadto bilang isa ka driver agud nga masaguran ang mga kabataan kag ang iya tiayon.
Sa wala ginalauman, naulamid siya sa isa ka kaso kag tubtub subong, iya pa nga ginaserbisyuhan ang ginpamatbat nga silot batok sa iya.
Sang una suno kay Geromiano, mabudlay para sa iya nga mapahilayo sa iya mga kabataan nga lunsay pa naga-eskwela.
Sa sulod sang presuhan suno kay Geromiano, nahatagan siya sang kahigayunan nga maka-angkon sang palangabuhi-an kag ini amo ang furniture making kag naka-eskwela sang furniture making agud mapaayo pa gid ang iya paghimu sang kagamitan kasubong sang cabinet, katre kag locker.
Bangud nga madamu ang iya cutomer, ginpahayag sang natungdan nga siya na mismo ang nagdesisyon nga saguron ang iya lima ka kabataan ilabi pa nga may yara naman sang iban nga pamilya ang iya tiayon.
Sa sulod sang presuhan, madamu siya sang nabinag-binag sa kabuhi kag mas napalapit sa Ginuo.
Sa pihak sang natabo, ginpahayag ni Geromiano nga indi upang ang pagkapareso kag wala sang imposible kun nagahimakas sa pagpangabuhi.
