ILOILO CITY – Tama gid ka importante para sa isa ka anak ang maka-angkon sang bug-os nga pamilya.
Ini ang natun-an sang isa ka anak nga nagdaku sa broken family sa diin ang iya amay kag iloy ang lunsay nag-angkon sang iban nga pamilya.
Sa interview sang Bombo Radyo kay Angela Cain-Espora sang Lapaz, Iloilo City, iya ginpahayag nga nagdaku siya sa luyo sang iya amay matapos siya nga ginbilin sang iya iloy sang naga-edad pa lang siya sadto sang 2 tubtub 3 ka bulan.
Sang una suno kay Espora, ang iya amay ang may nagkalain-lain nga bisyo kasubong na lang sang sugal, inom kag pagpakig-relasyon sa iban nga babayisa diin ang iya biological mother ang nangin kerida sang iya amay.
Sa pihak sini, hugot sila nga ginbaton sang legal wife sang iya amay.
Bangud nga nagpalagyo ang iya iloy, nagdaku siya suno kay Espora sa pag-atipan sang iya amay apang kun kaisa, ang ila nalang nga mga kasilingan ang nagabantay sa iya.
Kun wala naman sang may magabantay sa iya, ginpahayag ni Espora nga ginadala siya sang iya amay sa pagbyahe sang tricycle sa diin ang tricycle na mismo ang nagaserbe nila nga balay kun kaisa.
Nagbag-o man suno kay Espora ang pagginawi sang iya amay tubtub nga nakapangasawa liwat matapos napatay ang legal wife.
Ang masakit lang suno kay Espora amo nga indi siya mabaton sang iban niya nga mga utod.
Sa pagkamatuod suno sa natungdan, ang iya man lang mga utod kag manding ang nagapakala-in sa iya.
Isa sa iya ginhinulsulan suno kay Espora amo nga wala siya nahatagan sang malawig nga tion agud nga mapabutyag ang pagpalangga sa iya amay bangud nga sa lamharon nga edad, naka-angkon naman siya sang kaugalingon nga pamilya kag wala na naka-eskwela sa kolehiyo.
Wala na nagalaum pa si Espora nga batunon siya sang iya mga utod apang ang importante lang suno sa iya amo nga mapabatyag ang iya pagpalangga sa iya amay nga amo ang nagsagod sa iya.
