ILOILO CITY – Ginpakigbahin sang mga suldado ang ila kabuhi bilang isa ka amay kag bilang tagpangapin sang Pilipinas.
Subong nga adlaw sang mga amay suno kay Capt. Cenon Pancito III, tagpamaba sang 3rd Infantry Division sang Philippine Army, indi niya kaupod ang iya anak kag tiayon.
Bilang isa ka suldado, mabudlay suno kay Pancito bangud nga talagsa lamang sila nagakitaay sang iya pamilya.
Mabug-at nga responsibilidad suno kay Pancito ang iya ginatungdan bilang amay sa iya anak kag bilang amay sang mga Filipino.
Sa pihak sang mga pagpanghangkat, ginpahayag sang natungdan nga wala man siya sang may ginahinulsulan sa iya ginpili nga career nga nagdala sa iya sang madamu nga kaayuhan.
Samtang, para naman kay Staff Sergeant Christian Llanes sang Recruitment and Army Personnel Management Center 6 sang Philippine Army, ang iya kabuhi bilang isa ka amay kag suldado ang napun-an man sang pagpanghangkat.
Ginpahayag ni Llanes nga iya gid nga ginapahangop sa iya tiayon ang tuhoy sa trabaho sang isa ka suldado.
May mga tion man suno kay Llanes nga kinahanglan sang mga suldado nga isakripisyo ang tion para sa pamilya sa ngalan sang serbisyo publiko.
