MIAG-AO, ILOILO – Ang pagtuon sang maayo ang nangin sekreto sang labing una nga Magna Cum Laude sang Communication and Media Studies sang University of the Philippines – Visayas (UPV).
Sa ginpatigayon nga Graduation Ceremony sang UPV sa Miag-ao, Iloilo sang Hunyo 27, isa si Ge-Ann Marie Arenga sang Roxas City, Capiz ang nagpagkit sang sang kasaysayan sa nasambit nga unibersidad.
Sa interview sang Bombo Radyo kay Arenga, iya ginpahayag nga ang iya ginpili nga kurso ang may kaangtanan sa iya huyog sa patag sang news writing, script writing kag paghimu sang film projects.
Ini ang rason suno kay Arenga kun nga-a mas ginpili niya ang Communication and Media Studies ipaanggid sa iya napasaran nga kurso nga Bachelor of Science in Biology.
Kun kaisa suno kay Arenga, indi madula ang stigma sa mga Communication course apang bilang isa ka estudyante, iya napamatud-an nga mabudlay ang nasambit nga kurso.
Magluwas nga madamu ang tulun-an, madamu man ang mga proyekto nga dapat ipasa santo sa deadline.
Sa pihak sang kabudlay, ginpahayag sang natungdan nga importante gid nga hatagan sang tion ang pagtuon ilabi na kun may yara sang exams kag kun may mga school project nga dapat tapuson.
Sa iya bahin suno kay Arenga, may yara siya sang kaugalingon nga pamaagi sa pagtuon nga makabig nga pinasahi ipaanggid sa iban nga estudyante.
Lakip sa nangin inspirasyon sang UPV achiever amo nga mahatagan sang maayo nga pangabuhi ang iya pamilya.
Sa pihak sang tanan nga kabudlay, ginpahayag ni Arenga nga ang pinakamasadya nga bahin sang iya kabuhi amo ang paghatag sang kahigayunan sa iya ginikanan nga makasaka sa entablado kadungan sang Graduation Ceremony bilang tanda sang iya pagtapos nga may yara sang Latin Honor.
Sa subong, wala pa sang pinal nga desisyon si Arenga tuhoy sa iya pagasudlan nga trabaho.
