ILOILO CITY – Nagdangat na sa anom ang narekord nga patay bangud sa dengue hemorrhagic fever sa Syudad sang Iloilo.
Pinakaulihi nga narekord amo ang walo ka tuig nga babaye kag grade 2 pupil sa Iloilo Central Elementary School.
Samtang lakip naman sa mga biktima ang naghalin sa San Isidro, Jaro, Magsaysay, City Proper; North Fundidor, Molo; Hibao-an, Mandurriao kag Balabago, Jaro.
Kaangot sini, gilayon man nga nagpagwa si Iloilo City Mayor Jerry Treñas sang Executive Order No. 007 sa diin ginamando sini sa tanan nga mga opisina sang gobyerno, eskwelahan kag mga barangay nga magpanguna sa clean-up drive sa ila tagsa ka mga nasakupan nga lugar.
Diri kag ginpahayag ni Treñas nga nagdangat na sa 618 ang kaso sang dengue sa syudad sa diin ang mga biktima ang naga edad sang isa tubtub 10 ka tuig ang edad.
Samtang, sa interview naman sang Bombo Radyo kay Iloilo City Councilor Allan Zaldivar, chairman sang Committee on Health sa Iloilo City Council, iya ginpahayag nga magabulig ini kay Mayor Treñas sa pagtapna sa pagduging sang Dengue.
Suno kay Zaldivar, kinahanglan sang augmentation kag i-educate maayo ang mga pumuluyo agud matapna ang makakakamtay nga balatian.
