ILOILO CITY- Kinahanglan nga maghalong kag magpaninlo ang tanan kadungan sang padayun nga pagsaka sang kaso sang dengue hemorrhagic fever sa Western Visayas, kag sa iban pa nga bahin sang pungsod.
Sa interview sang Bombo Radyo kay Department of Health Secretary Francisco Duque III, iya ginpahayag nga indi dapat pagbalewalaun ang problema sa dengue.
Simple lang suno kay Duque ang solusyon sa problema ini amo ang pagpaninlo sa palibot.
Padayun man suno kay Duque ang kampanya sang Department of Health nga dapat takluban ang balde kag iban pa nga ginatipunan sang tubig agud indi pagpugaran sang lamok.
Padayun man suno kay Duque ang ila monitoring ukon obserbasyon sa mga lugar nga may mataas nga kaso sang dengue.
Kalabanan sa mga nabiktima sang dengueang naga edad 5 tubtob 9 anyos kag 10 tubtob 14 anyos bangud indi pa mabakod ang resistensya.
Nahibaluan nga nagdangat na sa 106, 630 ang kabug-usan nga kaso sang dengue sa pungsod sa diin mas mataas ini sang 85% kun ipaanggid sa 67,564 nga data sang nakaligad nga tuig.
