ILOILO CITY – Nanari-sari nga aktibidad ang patigayunon kadungan sang pagsaulog sang ika-8 nga Iloilo Photo Festival.
Sa interview sang Bombo Radyo kay Rex Paulino, coordinator sang Iloilo Photo Festival kag isa ka Photographer, iya ginpahayag nga ang Iloilo Photo Festival subong nga tuig ang patigayunon sa Agosto 21 tubtub 23, 2019.
May kaangtanan diri, madamu nga aktibidad ang patigayunon sa nagkalain-lain nga lugar sa Western Visayas.
Suno kay Paulino, may yara sang patigayunon nga mga lectures kag workshops, exhibit kag photography tours.
May yara man sang patigayunon nga photography contest nga may yara sang kategorya nga Non-DSLR kag DSLR kag ini ang bukas para sa tanan nga may hilig sa photography.
Ginpahayag ni Paulino nga mangin dinapit nga bisita sa patigayunon nga lectures kag workshops amo ang mga national kag internationally renowned photographers.// VC
Nakadepende sa tumalan-aw ang paghangop sa isa ka laragway.
Sa interview sang Bombo Radyo kay Rowena Peconcillo, Subject Group Head sang Arts and Design Track, iya ginpahayag nga ang tagsa ka tawo ang may yara sang nanari-sari nga paghangop kun ano ang kahulugan sang isa ka laragway.
Suno kay Peconcillo, bilang isa ka Photographer, may yara sang techniques sa pagkuha sang manami nga laragway apang ang importante amo nga mahangpan sang kadam-an ang kahulugan sini.
Mas makapaayo man kun ang caption ang nagasanto sa laragway agud nga mas madali nga mahangpan sang tumalan-aw.
Samtang, time management naman ang daku nga pagpanghangkat para sa Grade 12 Media Arts student nga si Asher Lance Marañon agud nga mabalanse ang iya pagtuon kag ang photography career.
Sa interview sang Bombo Radyo kay Marañon, iya ginpahayag nga bilang estudyante kag bag-uhanon sa patag sang photography, madamu siya sang pagpanghangkat nga naagyan.
Suno kay Marañon, sa kasubong niya nga estudyante, kinahanglanon ang pondo, equipment kag time management.
May mga tion man suno kay Marañon nga nagakadulaan siya sang paglaum nga ipadayon ang iya hilig apang sa bulig sang iya pamilya, abyan kag mentors, iya ini nga nalampuwasan kag nagpangibabaw ang iya determinasyon.
