ILOILO CITY – Wala ginakabig sang isa ka may Apert Syndrome nga sablag ang iya nga kondisyon sa pagbalay sang ambahanon kag pagpadala sang entry sa Bombo Music Festival 2020.
Sa interview sang Bombo Radyo kay Kris Traviña sang Jaro, Iloilo City, iya ginpahayag nga ang iya nga huyog sa musika ang impluwensya man sang iya pamilya.
Suno kay Traviña, ang una niya nga nahiligan amo ang pagsulat sang mga tula sa diin may yara na siya sang libro natuhoy sa poetry.
Bangud sini, iya naman nga naisipan nga magsulat sang mga ambahanon sa diin lakip sa iya ginakuhaan sang inspirasyon amo ang iya trabaho bilang wedding planner rason nga nakabalay siya sang ambahanon nahanungod sa kasal samtang ang isa pa gid niya ka ambahanon ang tuhoy naman sa pagkapaslaw sa kabuhi.
Ginpahayag ni Traviña nga luyag niya nga takson kun kutub sa diin ang iya masarangan.
Magluwas diri, luyag man niya nga itib-ong ang kultura sang mga Filipino rason nga nagdesisyon siya nga magpasakop sa Bombo Music Festival.
