ILOILO CITY – Bugal kag kadalag-an para sa isa ka manunudlo ang makita nga makatapos sa pagtuon kag maka-angkon sang maayo nga pagpangabuhi ang iya mga estudyante.
Ini ang sabat ni Judy Fabular, basketball coach, school clinic teacher sang Iloilo Central Elementary School kag Alternative Learning System teacher sa female dormitory sang Bureau of Jail Management and Penology, sa pamangkot kun anu ang nagatulod sa iya nga magpadayon sa pagtudlo sa pihak sang kabudlay kag kasakuon sa trabaho.
Sa interview sang Bombo Radyo kay Fabular, iya ginpahayag nga naghalin siya sa pigado nga pamilya kag kinahanglan niya nga magpangabudlay para nga makatapos sa pagtuon kag maka-angkon sang trabaho.
Suno kay kay Fabular, ang iya naagyan nga kabudlay sa pagpangabuhi ang nagatulod sa iya nga magpadayon sa teaching career agud nga makabulig man sa mga tawo nga nagakinahanglan sang paggiya.
Ginpahayag ni Fabular nga kapin na sa duha ka dekada siya nga nangin isa ka manunudlo sa elementary kag manug-apat ka tuig nga manunudlo sa Alternative Learning System sa tagsa ka Sabado.
Bilang isa ka manunudlo, ginpahayag ni Fabular nga indi lamang ang pagtudlo sang maayo ang iya katungdanan kundi lakip man ang pagganyat sa mga estudyante nga magpadayon sa pagtuon.
Indi kasubong sa regular students, ginpahayag sang natungdan nga mas madamu ang pagpanghangkat sa iya pagtudlo sa mga Persons Deprived of Liberty ukon mga preso.
Ini bangud nga sa kakulang sa pondo, siya na mismo ang nagamato-mato sa pagbakal sang mga kinahanglanon agud nga makatudlo sang maayo sa mga estudyante nga preso.
Ang iban sa mga preso suno kay Fabular ang indi madali nga tudlu-an rason nga kinahanglan niya nga id-idan ang pagtudlo.
Ang Sabado nga adlaw suno kay Fabular ang para kun tani sa iya pahuway apang mas ginpili niya nga magtudlo agud nga makabulig sa mga preso nga maka-angkon sang maayo nga kabuhi sa tion nga makaguwa na sa presuhan.
Indi mabayaran sang kwarta suno sa natungdan ang kalipay nga iya nabatyagan sa tion nga makita nga madamu sa iya mga estudyante ang nakatapos sa elementary kag high school tubtub nga makatapos sa kolehiyo kag makapangita sang maayo nga trabaho.
