ILOILO CITY – Masako na sa training ang Ilongga beauty queen nga si Ruffa Nava agud nga makakuha sang titulo sa coronation night sang Miss World Philippines 2019 nga patigayunon sa Smart Araneta Coliseum sa Setyembre 15.
Sa interview sang Bombo Radyo kay Nava, iya ginpahayag nga ang titulo nga Miss World Philippines ang ginakabig nga top prize sa nasambit nga pageant apang mas luyag niya nga makuha ang Reina Hispanoamericana.
Suno kay Nava, iya nga ginatutukan ang Question and Answer kag ang pasarela agud nga magdaug gikan sa 37 ka mga kandidata.
Ginpahayag ni Nava nga bag-o pa man siya natukiban sa patag sang modelling kag pageantry, naagyan niya nga magbaligya sang balut, chicharon kag ice cream, maglimpyo sang alukaba sang talaba kag paghaboy sang basura sang ila kasilingan agud nga maka-eskwela kag makatibawas sa kapigaduhon.
Ang mga nasambit nga kabudlay sa pagpangabuhi ang iya ginhimo nga inspirasyon agud nga magpadayon sa modelling kag pagentry career.
Paagi sa iya pag-intra sa mga beauty pageant, ginpahayag sang Ilongga beauty queen nga napakay-o niya ang ila balay kag napa-eskwela ang iya mga utod.
Sa subong, handum sang natungdan nga makatapos sa kolehiyo kag mangin isa ka flight attendant.
Si Nava ang ginkoronahan bilang Miss Iloilo Dinagyang Foundation Inc. 2018, nangin suki sang national pageant kag nangin tiglawas sa Pilipinas sa Supermodel International 2018.
