ILOILO CITY – Indi lamang lunsay kalipay ang pangabuhi sang isa ka komedyante.
Ini ang ginpamatud-an sang life story sang Ilonggo stand-up comedian nga si Miguel Garcia, indi niya matuod nga pangalan.
Sa programa Good Morning Philippines, ginpakigbahin sang 55 anyos nga si Garcia ang iya paghimakas bag-o nakasulod sa entertainment industry bilang isa ka stand-up comedian kag production assistant sa Metro Manila kag nangin entertainer sa luwas sang pungsod.
Suno kay Garcia, nagtapos siya sa kurso nga Bachelor of Science in Chemical Engineering kag nagtrabaho sa Department of Public Works and Highways 6 sa sulod sang 11 ka tuig
Bangud sa iya huyog sa patag sang komedya, ginbayaan ni Garcia ang iya trabaho kag nagpadulong sa Metro Manila agud nga mangin isa ka komedyante sa mga bar kag restaurant.
Naka-upod ni Garcia ang pila sa mga sikat nga entertainer kag komedyante kasubong nanday Blackjack, Joy Viado, Inday Garutay kag ang singer nga si Jaya.
Nahatagan man si Garcia sang kahigayunan nga makatrabaho bilang entertainer sa Japan sa sulod sang 10 ka tuig tubtub nga siya ang nagpauli sang 2006 bangud sa pila ka sirkumstansya.
Sa pihak sang iya nga pagpasadya sa iban nga tawo, ginpahayag sang natungdan nga siya mismo ang nagabatyag sang tuman nga kasubo ilabi na nga nabulag na ang iya duha ka mata bangud sa diabetes.
Ginpahayag ni Garcia nga luyag niya makilala ang iya biological family matapos nga napatay ang iya adoptive father sang 2006 kag ginbawi-an naman sang kabuhi ang iya adoptive mother sang nakaligad nga tuig.
Santo sa istorya suno kay Garcia, ginbilin siya sang iya iloy sa isa ka midwife sa Western Visayas Medical Center sang tuig 1964 apang wala gid niya mahibalu-an ang pangalan kag iban pa nga detalye tuhoy sa iya iloy.
Magluwas diri, ang midwife nga amo ang ginbilinan sa iya sang una ang napatay na.
Sa pihak sang mga pagpanghangkat sa iya kabuhi, ginpahayag ni Garcia nga nagalaum siya nga makilala gid niya ang iya biological family.
