ILOILO CITY – Handum sang isa ka Grade 12 student nga mangin isa ka bantog nga singer kag mangin isa ka registered nurse sa ulihi.
Sa interview sang Bombo Radyo kay Angel Villaruel, 18, sang Brgy. Bakhaw, Mandurriao, Iloilo City, iya ginpahayag nga nag-umpisa siya sa pagpakigbahin sa mga singing contest sang siya ang Grade 2 pa lang.
Suno kay Villaruel, ang iya nga pamilya ang nag-impluwensya sa iya sa patag sang musika.
Ginpahayag ni Villaruel nga bilang isa ka aspiring singer, iya gin-intrahan ang mga singing contest sa diin lakip na diri ang Bombo Music Festival.
Sa pagkamatuod suno sa natungdan, ang iya original composition ang iya nga ginpasakop sa Bombo Music Festival apang wala nagmadinalag-on.
Ginpahayag ni Villaruel nga iya nga ginahimu nga inspirasyon ang mga kritisismo nga iya nabaton agud nga mas mapaayo pa gid ang iya abilidad sa pagkanta kag malab-ot ang iya handum.
Samtang, naghatag man sang sample si Villaruel sang iya original composition nga iya ginpasakop sadto sa Bombo Music Festival.
