JORDAN, GUIMARAS – Madamu sang natun-an ang mga mga estudyante sang Jordan National High School sa pagpakigbahin sa Hobon Kawayan.
Ang Hobon Kawayan ang isa ka school organization nga gintukod sang 2014 nga ginabug-usan sang mga estudyante nga nagatukar sang musical instruments nga himu sa kawayan kasubong sang xylophone, angklung kag clarinet.
Sa interview sang Bombo Radyo kay John Chino Cudo, nagatukar sang xylophone kag angklung sa Hobon Kawayan, iya ginpahayag nga ginatudlu-an sila sa pagtukar sang nanari-sari nga musical insturments kag amo man sa tanan nga patag sang arts.
Magluwas diri, ginatudluan man sila sang maayo nga disiplina kag paminatasan.
Samtang, para naman kay Shanira Gallentes, nagatukar sang clarinet kag angklung, paagi sa pagpakigbahin sa nasambit nga organisasyon, natun-an niya ang pagtukar sang nanari-sari nga musical instruments.
Ang iya naman nga natun-an suno kay Gallentes ang iya man nga ginapaambit sa mga kasubong niya nga estudyante nga interesado magpakigbahin sa ila organisasyon.
