ILOILO CITY– Ginpanindugan ni Iloilo City Mayor Jerry Treñas nga wala na sang extension ang plaso nga ginhatag niya sa bar owners agud magpatuman sa guidelines kadungan sang pagdula sang Liquor ban.
Sa interview sang Bombo Radyo kay Treñas, iya ginpahayag nga magalibot na karon sa gab-i ang inspection team agud hibaluon ang compliance sang bar owners.
Nadala man sa dapat nga magsunod sa ginpaguwa nga guidelines ang 24 hour convinient stores.
Ginpasigurado ni Treñas nga hugot ang pagpatuman sang Executive Order 46 nga nagadula sa Liquor ban.
Sa pihak nga bahin, igapatawag ni Treñas ang Philippine National Police nga amo ang natuon sa pagpatuman sang kalinung kag katawhay sa tion nga ipatuman na ang writ of possession nga ginhatag sang korte sa MORE Electric and Power Corporation.
Ini ang may kaangtanan sa pagkuha sang MORE Power sa assets sang Panay Electric Company.
Nahibalu-an nga sang damlag lang, nagdesisyon si Presiding Judge Marie Yvette Go sang Regional Trial Court Branch 37, nga paboran ang MORE Power sa expropriation sa assets sang Panay Electric Company bilang electric power provider sa syudad sang Iloilo.
