ILOILO CITY- Positibo nga panan-awan sa kabuhi ang tema sang ambahanon nga napilian bilang isa sa top 12 finalist sa Bombo Music Festival 2020.
Sa interview sang Bombo Radyo kay Edgardo Miraflor, sang Tangub, Bacolod City nga composer sang Someday When I Am a King, iya ginpahayag nga sa masami, nagakasilaw kita sa kabuhi sang mga sikat kag mga manggaranon kag ginapanumdom naton nga sila ang pinakamapalaron.
Suno kay Miraflor, ginakalimtan na naton nga apisar pigado, mahimo sa gihapon nga mangin malipayon.
Ginpahayag niya nga ang kalipay, nagasandig sa kaugalingon nga desisyon.
Suno pa sa iya, ang Someday When I am King nagapalab-ot man sang mensahe nga mahimo kita mangin hari kag reyna ukon prinsipe kag prinsesa kun aton ginakabig nga manggad ang tagsa ka bugay sang Diyos.
Dako naman ang pagpasalamat ni Miraflor sa Bombo Music Festival bangud paagi diri, makilala sila nga mga composers nga ginakabig nga mga unspoken heroes sa industriya sang musika sa diin, sa masami, ginadayaw lamang ang mga performers ukon manug-amba.
Pinaagi sa Bombo Music festival suno sa iya, makabilin siya sang maayo nga legasiya ilabi na sa OPM.
