ILOILO CITY– Ginpanginwala sang mga manugbaligya sa Iloilo Terminal Market nga ginahimo nga sex den ang ibabaw sang ila mga stalls.
Sa interview sang Bombo Radyo kay Mr. Roland Cardilla, isa sa mga tag-iya sang stall, iya ginpahayag nga indi sex den ang ibabaw sang ila baligyaan.
Suno kay Cardilla, ang mga papag sa ibabaw sang ila stall ang nagaserbe palahuwayan sang ila mga trabahador kag ginabutangan sang iban nga mga baligya.
Samtang, ginpahayag ni Mr. Ernesto Javier, isa man sa mga nagapanag-iya sang stall, nga wala siya sang may nahibaluan tuhoy sa nasambit nga aktibidad.
Suno kay Javier, ang nagatinir sa mga papag amo ang mga tinawo sang mga nagabaligya.
Ang problema lang suno kay Javier amo ang mga menor de edad nga nagapalagyo sa tion nga may yara sang mga pulis nga nagapatigayon sang inspection sa lugar.
Sa pihak nga bahin, ginpahayag ni Mr. Eric San Agustin, market in charge sa nasambit nga merkado, nga sa subong wala pa sang may nadakpan nga nagahimo sang pagpakighilawas sa sulod sang Iloilo Terminal Market.
Ang problema lang suno kay San Agustin amo ang mga menor de edad nga nagaliho-liho sa sulod sang merkado.
Umpisa sa Lunes suno kay San Agustin, pangkuhaon na ang mga illegal structures lakip na ang mga papag nga yara sa ibabaw sang tagsa ka stall.
