LAPUZ, ILOILO CITY- Padayun ang ginahimo nga follow up investigation sang La Paz Police Station sa pagtiro patay sang motor riding suspects sa isa ka lalaki sa Rizal Lapuz Sur Iloilo City.
Sa interview sang Bombo Radyo kay Police Major Mark Evan Salvo, hepe sang La Paz Police Station, iya ginpahayag, nga subong gina-imbestigaran pa sang otoridad kun sa diin nagpadulong ang mga suspeks matapos ang ginhimo nga pagluthang sa biktima nga si Roy Guco.
Suno kay Salvo, wala sang rekord sa ila sa La Paz Police Station si Guco, apang sa Police Station 1 may rekord ini sang robbery kag theft.
Sa subong suno sa iya, wala pa sila sang matumod nga persons of interest sa pagluthang patay sa biktima.
Nahibaluan nga santo sa panaysayon ni Alyas Mark, una nila nabatian ang tatlo ka sunod-sunod nga lupok kag matapos sadto nagpalapit pa ang gunman sa biktima kag ginfinishing sang duha ka luthang.
Suno kay Alyas Mark, nagtulukay pa sila mismo sang gunman antes ini nagsakay sa motor kag nagpalagyo.
Una na ginpahayag sang mga malapit nga himata sang biktima, nga bag-o lang nakagwa sa Bureau of Jail Management and Penology si Guco, bangud man sa kaso may kaangtanan sa iligal nga droga.
Samtang sa interview sang Bombo Radyo kay Punong barangay Wilson Aleona sang Rizal Lapuz Sur, iya ginkumpirma nga may robbery kag theft nga kaso si Guco.
Pahayag pa niya nga sa impormasyon nga iya nabatun, bag-o lang nakagwa sa presohan ang biktima.
May utod man suno sa iya si Guco nga napreso man bangud sa iligal nga droga.
