ILOILO CITY- Ginapasalig sang Iloilo City Government nga matinluan ang mga dalanon sa syudad gikan sa mga on road parking.
Sa interview sang Bombo Radyo kay Iloilo City Mayor Jerry Treñas, iya ginpahayag nga naka-order na sang clamps ang Iloilo City Government para sa salakyan sang mga dungol nga drivers nga padayun ang pagpark sa mga dalanon.
Magluwas diri, nagapangita man suno kay Treñas sang posible mga investors ang syudad agud makapatukod sang building nga magaserbe parking lot.
Gina-review naman subong suno kay Treñas ang mga ordinansa nga nagapahanugot sang on road parking sa pila ka mga dalanon .
Samtang, ginpahayag man sang alkalde nga problema man sa subong amo ang mga poste sang mga telecommunications company nga yara napahamtang mismo sa dalanon.
Suno kay Treñas, naghatag na siya sang ultimatum tubtob Disyembre 31 sa mga telecommunications company agud kuhaon ang mga poste kag mga nagalinukot nga wirings.
Nagpasar naman sang resolusyon ang Iloilo City Council suno sa natungdan, nga tubtob Enero 2020 ang plaso sa mga kumpaniya agud kuhaon ang nagaserbe obstruction sa dalan.
Kun indi naman ini matuman suno sa natungdan, ang Iloilo City Government na mismo ang magapang-utod sang mga linya sang kuryente.
