ILOILO – Magasentro sa ila tagsa ka mga adbokasiya ang mga ginkoronahan sa Miss Iloilo Tourism 2019.
Matandaan nga sang nagligad nga Setyembre 21, ginkoronahan sanday: Tsina Jade Chu sang Anilao bilang Miss Iloilo Tourism 2019, Miss Iloilo Heritage 2019 si Jade Jaleco sang Cabatuan, Miss Eco Tourism 2019 si Kristine Graciela Artuz sang Passi City, 1st runner up si Jascha Angela Arengo sang Balasan kag second runner up si Jean Nicole Solinap sang New Lucena.
Gikan sa 18 ka mga maanyag kag maalam nga mga Ilongga beauty queens, ang lima ang nagpangibabaw agud nga mangin tourism ambassadress sang Iloilo.
Sa interview sang Bombo Radyo kay Miss Iloilo Tourism 2019 Tsina Jade Chu, iya ginpahayag nga ang iya adbokasiya amo ang “Protect, Preserve and Pass on”.
Suno kay Chu, bilang Miss Iloilo Tourism, indi niya luyag nga mangin isa lang ka beauty queen kundi luyag niya nga tutukan ang pagtib-ong kag pagtatap sang turismo kag kultura sang Iloilo agud nga nga mapanubli sang mga ulihing tubo.
Ginpahayag sang 20 anyos nga Business Administration graduate nga tuyo niya nga magpakig-angot sa nanari-sari nga grupo ukon organisasyon nga may adbokasiya kasubong sa iya.
Sa iya pagserbe bilang tourism ambassadress, ginpahayag ni Chu nga nalakip sa iya mission kag vission amo nga ipakilala sa mga dumuluong ang turismo kag kultura sang Iloilo.
