ILOILO CITY- Ginlunsyar sang US Embassy ang 2019 National Aeronautics and Space Administration International Space Apps Challenge, sa syudad sang Iloilo.
Mismo ang United States Embassy ang nagpanguna sang nasambit nga aktibidad kaupod ang local partners kaangay sang Central Philippine University kag Department of Science and Technology.
Sa exclusive interview sang Bombo Radyo kay US Embassy to the Philippines Cultural Attache Matt Keener, iya ginpahayag nga ang nasambit nga spaceapps challenge ang nagsugod sadtong tuig 2012.
Ginapakita sa nasambit nga challenge ang nagkalain-lain nga problema sa palibot, science kag space.
Suno kay Keener, pila ka grupo ang magatrabaho agud magpangita sang solusyon sa nasambit nga problema gamit ang data gikan mismo sa NASA.
Samtang nagadugay suno kay Keener, mas nagadamo ang nagapasakop bangud sang nakaligad nga tuig, nagdangat sa halos 18,000 ang nagtambong sa challenge gikan sa 75 ka mga pungsod.
Subong nga tuig suno sa natungdan, tatlo ka mga lugar ang ginpatigayunan sang event kag ini ang Iloilo, Davao kag Manila.
Katuyu-an sini amo nga ipakita ang data sa kabataan agud mismo sila ang makahatag sang solusyon sa mga problema sa ila tagsa ka mga komunidad.
