ILOILO CITY – Gindayaw sang Iloilo City Police Office (ICPO) ang pagpanikasog sang Iloilo City Government agud mapabilin ang kalinong kag disiplina sang mga pumuluyo sa pagselebrar sang pista-minatay subong nga tuig.
Sa interview sang Bombo Radyo kay ICPO Director PCol Martin Defensor Jr., iya ginpahayag nga nakabulig gid ang Taskforce Kalag-kalag, sa diin multi-agency ang nagahimo sang ila tagsa ka reponsibilidad sa pampubliko nga lugar ilabi na sa mga patyo.
Suno kay Defensor, nagapamati ang mga tawo sa sulit-sulit nga panawagan sang kapulisan para sa ila seguridad, amo nga gamay nalang nga hinganiban ang ila nakumpiska sa subong nga tuig, kag wala gani ini na-tunga ipaanggid sa ila nakumpiska sang nagligad nga Undas.
Iya ginpahayag nga wala man sang narekord nga pag-ginamo, pag-inaway, ukon daku nga insidente sa syudad sang Iloilo.
Dugang ni Defensor, may ara lang nagbisita sa patyo nga gintaasan sang blood pressure apang gilayon man ini nga nahatagan sang pagbulong, bangud may ara man sang
medical team sa area.
Samtang, ginpasalig man ni Defensor ang ila padayon nga pagbantay sa publiko subong nga Sabado, Nobyembre 2.
Suno kay Defensor, bug-os gihapon ang pwersa sang kapulisan sa syudad sang Iloilo bangud kon ano ang ila gindeploy kahapon, amo man ang makit-an subong nga adlaw.
Dugang ni Defensor, 14 ka oras ang duty sang pulis nagikan sa ICPO, sa diin ang isa ka oras antes kag pagkatapos sang aktwal nga duty sang pulis ang gintigana para sa pagturn-over sang ila mga responsibilidad kag orientation sa mga police desk.
Iya ginpahayag nga nagakadto man ang awtoridad sa mga barangay agud ma-monitor kon may ara sang naga-inom inom nga mga pumuluyo.
