Lopez Jaena Sur, Lapaz
ILOILO CITY-Wala nangin mabudlay para sa Barangay Lopez Jaena Sur, La Paz nga malakip sa listahan sang mga drug-cleared barangays sa Syudad sang Iloilo.
Sa interview sang Bombo Radyo kay Punong Barangay Johny Lego, iya ginpahayag nga resulta ini sang matahway nga pagpakig-istorya niya sa mga residente sang iya barangay nga yara sa drugs watchlist.
Suno kay Lego, tatlo ang drug surrenderees sa iya barangay kag tanan nga ini ang nakatapos gid sa drug rehabilitation.
Ginpahayag sang opisyal nga ginsunod lamang nila ang proseso nga gina-require sa ila sang mga ahensya nga nagabug-os sang regional oversight committee nga amo ang Philippine National Police, Department of the Interior and Local Government, Department of Health kag Philippine Drug Enforcement Agency.
Nahibaluan nga magluwas sa Lopez Jaena Sur,nalakip man sa drug-cleared barangays ang San Jose sa Arevalo;Aguinaldo sa LaPaz; Arsenal-Aduana, Inday, Nonoy, Rima-Rizal, Sto. Rosario Duran, Tanza Timawa 1 kag 2 sa Iloilo City Proper; Loboc kag Punong sa Lapuz; Javellana sa Jaro; Calajunan, Guzman-Jesena, Pali-Benedicto, San Rafael, PHHC Block 17 kag 22, Dungon C sa Mandurriao; kag Avanceña, Poblacion, South Fundidor, San Antonio kag Taal sa Molo.
Ginkalipay naman ni Iloilo City Police Office Director Pol. Col. Martin Defensor Jr., nga masobra na 20 na ka mga barangay sa syudad ang drug-cleared.
Gin-engganyo man niya ang iban pa gid nga mga barangay nga mag-apply man agud nga madeklarar man nga drug-cleared.
Gin-athag naman ni Defensor nga apisar drug-cleared ang isa ka barangay, magapadayon gihapon ang pagbantay sa ila sang otoridad.
