GUIMARAS – Luyag athagon sang Integrated Bar of the Philippines (IBP) kun bala ang nauna nga order sang Philippine Coast Guard (PCG) kag Maritime Industry Authority (MARINA) nga ginpaguwa sang nagligad nga Oktubre 25 ang mas nagapangibabaw sa mandu sang korte sang Nobyembre 4.
Ini bangud apisar may napaguwa na nga desisyon ang Regional Trial Court (RTC) nga nagadumili sa otoridad sa pagpasaka sa mga trapal sang mga nagabiyahe nga pump boat via Iloilo-Guimaras vice versa, wala gihapon ini napatuman tubtob subong.
Sa interview sang Bombo Radyo kay Atty. Vicente De Asis sang IBP Guimaras Chapter, iya ginpahayag nga nagpasaka sila sang motion for clarification bangud nagapati sila sa demokrasya kag dapat nga tumanon ang rule of law.
Nagaguwa suno kay De Asis nga kun wala pa gihapon napatuman ang nasambit nga pagsulundan, kasubong nga daw mas mataas pa ang duha ka mga ahensya sa hukmanan.
Sa pahayag naman sang Maritime Industry Authority, may yara na sila sang subsequent order nga ginpaguwa sang Oktubre 25, nagsabat si De Asis nga katungdanan kun tani sang legal counsel sang duha ka mga ahensya nga pahibaluon ang korte.
Ginpahayag man ni De Asis nga indi niya mahangpan kun nga-a ginapabudlayan pa sang duha ka ahensya ang mga pumuluyo sang Guimaras.
