ILOILO CITY – Nagapati ang Iloilo City Anti-Smoking Task Force (ICAST) nga dapat may suporta gid ang kada barangay sa syudad agud maimplementar sang maayo ang ginaduso sang Department of Health (DOH) Region 6 nga pagpataas sang edad sang ginadumilian sa pagpanigarilyo.
Ini ang halin sa edad nga 18 anyos kag ginaduso nga sayluhon sa 21 anyos agud malikawan ang mga sakit nga posible ihatag sang amo nga bisyo sa mga kabataan.
Sa interview sang Bombo Radyo kay ICAST Head Iñigo Garingalao, iya ginpahayag nga isa ini ka maayo nga lihok gikan sa DOH apang mas maayo gid kon ugyunan ini sang mga local units ukon kabaranggayan.
Suno kay Garingalao, sa subong, mas manubo na ang record sang kabataan nga madakpan sang awtoridad nga nagapanigarilyo kag ini ang tungod man sa padayon nga kampanya, lakip na ang pagkadto sang ICAST sa mga eskwelahan agud lamang mapahanumdom sa mga bata nga likawan ang pagpanigarilyo.
