ILOILO – Nagpaathag ang Maritime Industry Authority (MARINA) tuhoy sa indi sa gihapon pagbutang sang trapal sa mga pumpboat nga nagabyahe Iloilo Guimaras vice versa.
Sa interview sang Bombo Radyo kay Engr. Jose Venancio Vero, regional director sang MARINA 6, iya ginpahayag nga tubtub subong wala pa nakapasa sang position paper ang mga operators sang pumpboat sa ila opisina.
Suno kay Vero, kinahanglan ang position paper bangud diri mahibaluan kun ngaa indi makasunod ang mga operators sa specifications nga nasaad sa memorandum nga ginapagwa sang Maritime Industry Authority.
Partikular nga gintumod ni Vero amo ang trapal nga nagaserbe atop sa mga pumpboat sa diin nagtuga ini sang daku nga kontrobersiya.
Nahibaluan nga santo sa memorandum nga ginpagwa sang Oktubre 25 kag pirmado ni Vice-Admiral Narciso A. Vingson Jr., ang trapal ang dapat yara sa 1.8 meters, ang kalabaon ukon dapat nga 50% sang pump boat, 80 percent ang width ukon kasangkadon kag ang angle sang deflection ang indi dapat maglapaw sa 15 degrees gikan sa horizontal line.
Ang mga pasahero ang nagakadapat nga magsuksok sang life jacket, 75% passenger capacity, sunrise to sunset ang operations sang pagbyahe, may yara sang byahe sa tion sang fair weather condition kag may yara sang radio distress signal ukon communications ang tagsa ka pump boat.
Ang nasambit nga issuance ukon authority ang nasanto sa phase in/phase out program sang wooden-hulled motorbanca santo sa ginaduso sang kooperatiba ukon boat owners.
Nahibaluan nga subong nga adlaw magapatigayon sang dry run sa mga pumpboat nga may bago nga disenyo sang trapal.
